Dördüncü oturum Ciygoz'un mektubunun okunmasıyla başladı

Dünya Kırım Tatar Kongresi(DKTK) Yönetim Kurulu Toplantısı dördüncü oturumu, 26 Şubat davası kapsamında tutuklanan Kırım Tatar Milli Meclisi Başkan Yardımcısı Ahtem Çiygöz'ün gönderdiği mektubun okunması ile başladı.

İşte Çiygoz'un mektubu:

"Apishaneden

İyül -Temmuz 30-31 künleri Türkiyeniñ Eskişehir şeerinde ötkerilmesi beklenilgen Dünya Qırımtatar Kongressi icra şurasınıñ azalarına ve toplaşuv iştirakçilerine muracaat!

Men sizlernen fikirlerimni paylaşıp, kongress işi boyunca bazı tekliflerimni aydınlatmaq isteyim.

Menimce, kongressniñ temsiliy vazifelerini keñleştirmek kerek. Esas maqsat - halqara institutlar tarafından resmiy şekilde Qırımda qırımtatar devletçiliginiñ tanılması içün areketler yapılmalı.

Şu sebepten qırımtatarlarnıñ bütün quvetine tayanıp, zorbalıqsız usullar vastasınen küreşmelimiz - petitsiyalarnıñ tizilmesi, mahkemeler, imza toplanması, miting ve toplaşuvlar, çeşit türlü aktsiyalar - em diplomatik missiyalar, em de qırımtatarlar yaşağan memleketlerniñ akimiyetleri ögünde.

Qırımtatar derneklerinde, yaşağan devletleriniñ qanunlarına köre, islâatlar keçirip, tüzüklerine deñişmeler kirsetmeli: öz-özüni tanımaqtan ibaret olğan medeniy ve etnik meselelerden siyasiy meselelerge keçmek kerektir. Er bir qırımtatarı ögünde - halqara cemaatçılıq tarafından qırımtatar devletçiliginiñ tanılması maqsadı turmalı. Dernekler qurulışı saylavlar vastasınen tizilmek kerek. Er bir köy, qasaba, rayon ve şeerde saylavlar esasında bölükler teşkil etilmeli. Yaşlar bizim tayançımız olmaq kerek!

Bizler, qırımtatarlar, dünyanıñ qaysı köşesinde yaşasaq da, halqımıznıñ kelecegimizden mesülietlimiz! Tarihiy Vatan - Qırımda yaşağan qırımtatarlar al-azırda yüz-yüzge canavarnen qaldılar - onıñ adı Rusiye! Qırımtatarlarğa qarşı yapılğan qaçıruvlar, apis cezaları, öldürüvler, basqılar, işğalci rus ükümeti tarafından tamır halqqa qarşı qullanılğan azaplar ve ahlâqiy terror dünyanıñ er bir köşesinde yaşağan qırımtatarlarnı birleştirmek kerek. İşğal olğan yarımadadaki vatandaşlarımıznıñ havfsızlığı – bütün qırımtatarlarnıñ mesülietidir.

İlk evelâ areketsizlik ve problem olğanını dünyanıñ çeşit köşelerinde kütleviy narazılıqlar vastasınen bildirilmemesi ve yalıñız ilân etilmesi - mesülietsizliktir! Halqara institutlar öz işandıruvlarını becermesi içün – bizim öz-özümizni idare etüv aqqımız, insan aqları, halq ve millet aqları yerine ketirilmesi içün, bizim er künlik tizilgen planımız olmalı.
Yarımadada yaşağan 300 biñden ziyade qırımtatarı büyük halqnıñ bir parçası olğanını er kün em körmek, em eşitmek, em de duymaq kerek. Vatanımız Qırımda yaşağan er bir qırımtatarınıñ havfsızlığı ve azatlığı içün bizler çalışqan ve faydalı olğan usullar vastasınen küreşmelimiz.

Bütün dünya bizim areketlerimiz adaletli olğanını añlap, qırımtatar halqınıñ qorçalavına qoşulmaq kerek. Er bir resmiy eyyet qırımtatarlar yaşağan memleketke kelgen vaqıt mıtlaqa qırımtatarlarnıñ tertip-nizamı ve maqsadkârlığını is etmeli.

Öz başına bir şey olmay! Keçmişte olğan hatalar şimdi tekrarlanmamalı. Özüni qırımtatarı olaraq saymaq - büyük şeref ve mesüliettir!

Ahtem Çiygoz,
Qırımtatar Milliy Meclisiniñ reis muavini,
Bağçasaray regional meclisiniñ azası

2016 senesi iyül 28 künü,
Aqmescit -Qırım"

Asya Atila